SIBU, April 21: Penyandang sitak Parlimen Sri Aman, Datuk Masir Kujat madahka diri enda nangi enggau gempung Pakatan Harapan (PH), Democratic Action Party (DAP) enggau Parti Keadilan Rakyat (PKR) ke deka bekerejasama nyatup iya ba sitak nya ba pegawa bepilih ke-14 (PRU14) tu ila.
Ku Masir, iya udah gawa ke rayat ba sitak nya pengelama 10 taun.
Ba PRU13, iya udah disatup nengah 4 penyuru iya nya nengah chalun ari Sarawak Workers Party (SWP), PKR, Bebas nyengkaum iya empu, taja pia BN agi ulih menang.
Nya alai ku iya, mayuh agi chalun manah agi laban laban menua kitai Malaysia endang ngemeranka demokrasi.
Empai lama udah, ba sebengkah aum ke diatur gempung PH di Sri Aman, chairman Dap Sri Aman udah nerima Norina Umoi chalun ari PKR bediri di sitak nya ngarika gempung penyakal.
Kededua parti ari gempung PH nya mega deka bekerejasama ngaga strategi dikena ngemujurka kimpin maya PRU tu ila.
Taja pia, Masir ke deka dichalun baru ngetanka penuduk nya madahka BN – PRS nadai penanggul ngetanka sitak nya laban iya udah udah meri ngaul sereta servis ngagai rayat ba tetiap sukut sitak nya kenyau ari 10 taun ke udah.
Tambah mega iya ngembuan kaul ke manah sereta ulih bekerejasa enggau tiga iku pengari raya kunsil negeri ari baruh sitak Sri Aman baka Datuk Snowdan Lawan (Balai Ringin), Datuk Mong Dagang (Bukit Begunan) enggau Datuk Francis Harden (Simanggang).
Sitak Parlimen Sri Aman ngembuan 33,099 pengundi ke alai 23,323 (70 peratus) bansa Iban, 5,571 (17 peratus) bansa Cina, 3,629 (11 peratus) Melayu enggau ke bukai nyengkaum Bidayuh bisi 562 iku (2 peratus). — DayakDaily
