Manyin: Sitak Bidayuh deka meri pemujur besai ungkup BN ba PRU14

Datuk Seri Michael Manyin Jawong

KUCHING, Jan 14: Pengundi Bidayuh di negeri tu besemaya deka meri pemujur besai ngagai Barisan Nasional (BN) ba Pengawa Bepilih Besai ke-14 (PRU14) ila, ku Mandal Presiden Parti Pesaka Bumiputera Bersatu (PBB) Datuk Seri Michael Manyin Jawong.

Ku iya, raban bansa Bidayuh nadai kala enda ingatka pemaik perintah ngelama tu tj nguji ngemansangka bansa nya dalam bemacham bidang kelimpah nyukung penuh inisiatif ekonomi digital Kepala Menteri, Datuk Patinggi Abang Johari Tun Openg ti deka ngangkatka ekonomi Sarawak.

“Lebih 200,000 bansa Bidayuh di negeri tu bediri teguh di belakang (Kepala Menteri Datuk Patinggi) Abang Johari (Tun Openg) ke mega Presiden PBB.

“Kami bansa Bidayuh patut malas budi perintah Barisan Nasional ba PRU14 ila, lalu kami besemaya deka merj pemujur besai ngagai BN ba sitak Bidayuh,” ku iya ba Pengerami Bejadi Aum Pengari Tiga Taun Sekali Pampang Parti PBB Zon 3, iya nya Serembu, Mambong, Tarat, Tebedu, Kedup enggau Bukit Semunja ti dipenyadika Abang Johari ditu kemari.

Sama bisi ngulu pengerami nya, Sapit Kepala Menteri Datuk Amar Douglas Uggah Embas enggau Datuk Amar Awang Tengah Ali Hasan, ke alai seduai sama mega Sapit Presiden PBB disempulang Sekretari Besai PBB, Datuk Seri Dr Stephen Rundi Utom.

Taja pia, Manyin ke mega Menteri Pelajar, Sains enggau Pansik Teknologi madahka raban bansa Bidayuh agi begunaka pemansang kelebih agi dalam bidang ekonomi enggau infrastruktur baka jalai alun, pelajar nyengkaum bekal elektrik enggau ai paip. — DayakDaily