KUCHING, April 30: Chalun Barisan Nasional (BN) Stampin Datuk Dr Sim Kui Hian kemari ngelancharka manifesto ti mungkur pelin lima taun.
Manifesto nya mungkur pelajar, rumah ulih dibeli, ngangkatka aktiviti ekonomi, entali ai enggau nagang ampuh bah, komuniti enggau trafik sereta jalai alun.
Ku iya, pemujur menang di Stampin beguna amat ngambika dua ‘injin’ beroperasi lalu mai mayuh agi pemansang ngagai sitak nya.
Nengah pemisi ‘injin’ baru nya ku iya, mayuh agi pemansang enggau ungkup belanja ulih dipinta ke pemaik semua.
“Kami meseti menang. Pengudah nya baru kitai nuntut pulai hak ke bisi dalam MA63 (Sempekat Malaysia 1963),” ku iya.
Ku iya ti mega Presiden Parti Rakyat Bersatu Sarawak (SUPP), pengawa bepilih besai sekali tu ukai aja ungkup Stampin tang serata Sarawak. — DayakDaily
