Raban bansa Lun Bawang dipinta nyaup meri pemujur besai ngagai BN ba PRU14

Datuk Patinggi Abang Johari Tun Openg

MIRI, April 30: Kepala Menteri Datuk Patinggi Abang Johari Tun Openg minta raban bansa Lun Bawang mantu meri pemujur besai ngagai BN ngambika iya ke nyadi kepala menteri bisi pengandal agi berunding enggau Putrajaya.

Perkara nya dibantaika Sapit Kepala Menteri Datuk Amar Awang Tengah Ali Hasan nengah teks jaku Kepala Menteri ti dibacha iya ditu malam kemari.

Ku iya, BN udah ngungkupka dua kerusi ungkup Orang Ulu ba renggat Parlimen iya nya Baram enggau Lawas dikena ngarika sada Orang Ulu di Dewan Rakyat.

“Sukung kuat raban bansa Lun Bawang beguna amat ba PRU14 ini, kelebih agi lebuh bisi pengari ba perintah besai ti nyamin mayuh agi pemansang ulih digaga ke pengelantang raban bansa Lun Bawang,” ku iya.

Iya dekaka raban bansa Orang Ulu nentuka kedua-dua kerusi nya menang ari baruh tiket BN maya PRU14, ngambika pengari suda ulih ngenataika sada enggau pinta ba pemansang sida ngagai perintah besai.


Awang Tengah mega ngelalau semua chalun ke bediri enggau raban ke bekimpin ke chalun sida ngambika enda nyungkit isu ti negu sensitiviti rayat di negeri tu sepanjai Pengawa Bepilih Besai Ke-14 (PRU14) ini.

Ku iya, enda ngira bagi parti, sida ke bediri ba PRU14 tu ngembuan tanggungpengawa nyaga pengelikun enggau penyerakup rayat. — DayakDaily

Share this article!