KUCHING, April 8: Manifesto Barisan Nasional (BN) ti dilanchar Chairman parti nya Datuk Seri Najib Tun Razak malam kemari tau dipadahka baka nukik penaluk enggau aspirasi rayat di Sabah enggau Sarawak.
Penganalisis politik madahka manifesto 220 lambar nya mandangka komitmen enggau pemereti ati Najib ngagai aspirasi kedua-dua negeri.
Najib uda 60 kali nemuai ke Sarawak ngagai 163 iti endur kenyau dichiri nyadi Menteri Besai ba taun 2009.
Nya kebuah, manifesto BN ke dikena napi pengawa bepilih besai ke-14 iya nya deka ngamatka Sempekat Malaysia 1963 bepelasarka konsensus.
Iya mega besemaya muka sekula ngena jaku juga Inggeris di Sabah enggau Sarawak ke nyadi projek keterubah, munaska bida rega entara Semenanjung Malaysia enggau Sabah-Sarawak, sereta negapka komuniti Dayak enggau Kadazandusun.
Semaya bukai nyengkaum ngemanahka rumah panjani, ngemasukka mayuh agi fakta enggau perspektif ari Sabah enggau Sarawak dalam mata pelajar Sejarah, meri RM2.3 bilion udikena ngemesaika bungkur bekal elektrik sereta ngangkatka kualiti bungkur telekomunikasi nengah ungkup belanja RM2 bilion.
Manifesto ti berambaika leka jaku ‘Bersama BN, Hebatkan Negaraku’ dipancharka terus nengah beberapa stesen televisyen. — DayakDaily
