SUPP udah sedia ngambi pulai enam kerusi ari penyakal

Datuk Dr Sim Kui Hian

KUCHING, April 8: Parti Sa’ati Rakyat Sarawak (SUPP) diatu ba tikas ke pemadu manah ngambi pulai enam kerusi Parlimen ke kala endur sida alah sebedau tu maya Pengawa Bepilih Besai Ke-14 (PRU14).

Presiden SUPP, Datuk Dr Sim Kui Hian madah, Barisan Nasional (BN) Sarawak meseti menang besai maya PRU14 dikena negapka juluk negeri nuntut hak baka ke dalam Sempekat Malaysia 1963 (MA63).

Sebedau tu, ba PRU13, BN Sarawak udah alah ba enam kerusi ari 31 kerusi Parlimen ke alai semua kerusi ke alah nya diempu SUPP.

Parlimen Stampin, Bandar Kuching, Sarikei, Sibu enggau Lanang udah alah ba jari DAP lalu Parlimen Miri alah ba jari PKR.

Semina siti kerusi SUPP aja ke dimenang sida iya nya Parlimen Serian ke dimenang Datuk Seri Richard Riot Jaem, ke mega Menteri Pengatur Pengerja Pengawa.

Ku Dr Sim, nitihka gaya sukung enggau penyerakup ke tegap ba peranak bansa Cina di negeri tu, iya pechaya BN ulih ngambi pulai baru enam kerusi ti dimenang penyakal maya PRU13.

Iya bejaku munyi nya pengudah pengerami ngelancharka seminar mensia mayuh ‘Inisiatif Satu Jajaran Satu Laluan (OBOR): Cabaran dan Peluang Sarawak” ti dilanchar Kepala Menteri, Datuk Patinggi Abang Johari Tun Openg, di Dewan Sa’ati, Ibu Pejabat SUPP ditu.

Nya alai iya minta pengundi bansa Cina ngambika ngubah mentaliti kenu ku sida patut ngundi BN ngambika bekuasa dba renggat negeri lalu penyakal ba renggat perintah besai.

Ketegal alah besai ba PRU13 taun 2013, SUPP betapi enggau penanggul dalam partj nyentuk ke bisi sekeda ketuai parti nya ningkilka diri ari parti lalu numbuhka repik parti, Parti Rakyat Bersatu (UPP).

Taja pia, bulan siti nyin tadi, kedua-dua parti nya udah nyain Sempekat Pemereti Ati (MoU) dikena neguhka kerejasama napi PRU14.

Kelimpah ari nya, kedua-dua parti mega udah setuju ngiga chara begempung nyadj siti entiti politik ke besai agi ti tau pulaika pemaik bansa Cina enggau komuniti bukai ari baruh BN. — DayakDaily