Manifesto BN deka fokus agi ngagai S’wak enggau Sabah

Datuk Seri Najib Tun Razak

MIRI, April 5: Manifesto Barisan Nasional (BN) ungkup pengawa bepilih besai ke-14 (PRU14) deka dilanchar kena 7 April tu deka fokus ngagai pemansang di Sarawak enggau Sabah, ku Datuk Seri Najib Tun Razak.

Najib madah, manifesto nya deka mandangka komitmen BN ngemansangka agenda pemansang di Sarawak enggau Sabah ungkup timpuh lima taun ke deka datai.

“Manifesto BN ke deka dilanchar kena April 7 tu bisi beberapa pekara beray ungkup Sarawak enggau Sabah,” ku iya lebuh nutup seminar Pemansang enggau Nyadi Ketuai Ketuai Raban Bansa renggat Negeri Sarawak 2018 (Bagi Miri, Bintulu enggau Limbang) ditu.

Najib ti mega Chairman BN madah, komitmen ngagai program pemansang di Sarawak dipandang nengah 60 kali penemuai ngagai 160 endur di Sarawak sekumbang semilan taun nyadi menteri besai.

“Sekumabang ke nemuai nya, RM4.3 bilion udah diungkupka bemacham projek di Sarawak,” ku iya .


Menteri besai nya mega ningkah jaku tuduh sekeda individu ti madah kebuah Sarawak enda maju ketegal ulah rayat Sarawak ri ngelusu sereta amu.

“Aku nadai kala ngemansutka jaku ti tau ngemedis ati orang Sarawak, aku nadai kala madahka orang Sarawak ngelusu sereta amu laban aku nemu rayat Sarawak enda ngelusu sereta amu,” ku iya.

Ku iya, perintah besai diatu enda ngemaruhka penau rayat Sarawak tang diaku nengah pemeri kontrak ngagai kontraktor Sarawak ngambika ngaga Pan Borneo Highway.

Ku iya, naka ke diatu perintah besai puas ati enggau pemujur projek nya ti mandangka rayat Sarawak ulih dikearap ngaga projek besai.

Ku menteri nya, enti sesebengkah negeri enda maju, nyadi tanggungpengawa ketuai ngerapitka seraka pemansang ngambika sebaka enggau negeri-negeri bukai nengah pemeri ungkup belanja ke mayuh ngagai negeri ti amat begunaka pemansang.

Iya pechaya Sarawak deka tetap nyadi kuta kuat BN bepelasarka rekod-rekod pemujur ke diulih maya pengawa bepilih besai ke sebedau tu.

Iya mega deka kerusi ke dimenang penyakal di Sarawak dirampas BN baru kelebih agi kerusi Parlimen Miri.

“Saya dekaka Parlimen Miri diambi BN pulai baru,” ku iya ditangkanka tempik jari ari bala ke bisi datai

Sapit Kepala Menteri ti mega chairman komiti pengatur, Datuk Amar Douglas Uggah Embas madah, penemuai Najib ke sekali ti ke-60 ke Sarawak mandangka komitmen Menteri Besai nya ngemansangka Sarawak dibanding enggau ex-menteri besai ke sebedau tu.

Sama bisi ngulu pengerami nya Kepala Menteri, Datuk Patinggi Abang Johari Tun Openg.

Bisi 1,500 iku baka ketuai bansa, raban bansa enggau genturung pendiau nyeretai seminar dua hari nya. — DayakDaily

Share this article!