MIRI, Julai 30: Bayar kompaun nyentuk RM200 deka ditinggang ngagai orang ti mandangka iklan ‘fishtail’, kain rentang enggau papan pemadah jalai ti nadai pemendar ari Majlis Bandaraya Miri (MCC).
MCC madah, atur terit meseti diambi berindik ari penambah sebana ari mensia mayuh sentang pekara nya ti tau ngeruga pengelikun penguna jalai alun, nekul jalai serta enda manah dipeda.
“MCC deka ngerampas iklan fishtail enggau kain rentang ke nadai pemendar, ngeluarka notis kompaun ngagai pengempu kerwban iklan ti nadai pemendar nya,” ku MCC nengah sebengkah penerang sehari tu.
MCC madahka bayar kompaun RM100 ungkup tetiap iklan fishtail lalu RM200 ngagai tetiap kain rentang ti dilekat nadai pemendar ti dikeluarka ngagai orang nya, lalu ungkup papan pemadah jalai, MCC deka ngerampas rengka nya disempulang enggau notis kompaun.
“Orang ke bisi ati ngelekatka iklan fishtail enggau kain rentang tau minta permit ari MCC sereta ngenataika peminta sida di kaunter no 5 Kaunter Servis Ejensi Perintah Negeri ba Palan Transformasi Bandar Miri,” ku penerang nya. — DayakDaily
