Malam Tubai Pengerindu ngempuruka bala artis diatur Ogos 16 di D’ Dayak Cafe

Teelong Tee

KUCHING, Ogos 14: Malam Gempuru Tubai Pengerindu deka diatur ba D’ Dayak Cafe Kota Samarahan kena Ogos 16 tu pukul 8.00 malam.

Teelong Tee, pengempu D’ Dayak Cafe madahka tuju gempuru nya diatur ngambika ulih ngelumu semua raban orang ti regas ngemeranka pengawa ba bidang muzik enggau lagu dalam industri muzik Dayak di Sarawak.

Kelimpah ari nya mega nyadika pelasar endur ngedut kaul entara peminat lagu enggau muzik Iban enggau raban artis ke alai sida malam nya ulih betemu enggau penanyi ti dikerinduka sida.

Gempuru tu dikearap ulih ngangkatka pemereti ati enggau pemanah kaul enggau pangan diri.

Ungkup malam nya mega, semua raban artis baka penanyi, komposer, pemuzik, produser album, pengarang leka lagu enggau mensia mayuh sama diperansang datai magang.


“D’ Dayak Cafe Kota Samarahan nusun jari sepuluh enggau ati ke gaga deka nerima penatai bala kita datai ngagai gempuri nya ke deka diatur kena malam Hari Empat (Ogos 16), pukul 8.00 malam.

“Kelimpah beperindang enggau bala artisi ti dikangau, atur pengawa bukai ke bisi disempulang ke malam nya baka ngelancharka leka lagu video Tubai Pengerindu,bepantun, main ngiga ‘ratu’ enggau open-mic,” ku Teelong.

Ku iya baru, pengawa bepantun nya deka dipejalaika Roselind Muntai iya nya siku indu bansa Iban ke beasal ari Kapit ti udah tampak nama endang landik bepantun, ke deka nyada pantun peransang ngagai semua ke bisi datai ngerichahka malam nya ila.

Ba main ngiga ratu mega, raban pengatur bisi nyendiaka sagu ati ngagai orang dipilih nyadi ratu malam nya.

“Dua iku artis baru Isa Lee ke benung popular enggau single iya Tubai Pengerindu deka merindang bala mayuh malam nya.

“Isa Lee mega deka merindang begulai enggau champion pekit belagu MK Smokehouse Angela Ryann,” kuTeelong.

Berebak enggau nya, Isa Lee lebuh dikerandau sentang pengawa ngelancharka leka lagu video Tubai Pengerindu madah, leka lagu video digaga Difison Jelema enggau Jeffery Loter. Leka lagu video tu ‘unofficial’ tang semina dikena promo single Tubai Pengerindu.

Isa Lee

Tubai Pengerindu dirikod ba tiga iti studio iya nya Ranyai Sound Studio, Begulai Sejalai Production (BSP) engggau OCHSP. Muzik digaga Cami Tan enggau Amerio Evan @ Abon.

Pengawa ngerikod vokal enggau muzik mega diaduka tiga iti studio tu. Taja pia pengawa ‘mixing’ enggau ‘editing’ diaduka Iran Amri Mosuddiq, siku pengelicha muzik ari Padang Indonesia ke gawa ba Unimas diatu.

Leka lagu video tauka Tubai Pengerindu tu besai reti laban aku mai pengerindu enggau berita ti badas nengah lagu tu.

“Semua orang rindu ninga leka lagu tu lalu ari nya aku mai sida meda pemanah jaku Iban,” ku Isa.

“Aku beterima kasih ngagai Jimbun Tawai ari Majlis Adat Istiadat laban udah mayuh meri penemu pasal leka jaku ti badas ke patut dikena.

“Aku mega beterima ngagai Mr Harold Unsie ari Gerempung Pemansang Pelajar Jaku Iban (AEDIL) laban enda kala leju nulung ngelatika leka lagu ti dikena aku ba lagu nya,” pia ku Isa ngujungka randau enggau pemberita. — DayakDaily