MA63 ukai ‘pejal politik’ — Cobbold

PBDS Baru President Cobbold John Lusoi — DayakDaily.com

KUCHING, Dis 27: Presiden Parti Bansa Dayak Sarawak Baru (PBDSB) Cobbold John Lusoi madahka jaku ti dipansut Menteri Besai Datuk Seri Najib Tun Razak maya Gempuru Tiga Taun Sekali Parti Sa’ati Rakyat Sarawak (SUPP) empai lama tau dikumbai “pejal politik “.

Menteri Besai lebuh ke bejaku nya bisi dirikod nyebut, iya sedia mulai ungkup Sabah Sarawak nyemaka Malaysia kala ngambi tauka enda sengaja ngambi ungkup nya ti bisi ditulis dalam Sempekat Malaysia MA63. Iya madah bisi dua iti pinta iya nya, nadai jaku pansut ari Gempung Malaysia sereta mega minta rayat Sarawak nyukung penuh Perintah Barisan Nasional (BN), ku Cobbold mejah jaku Najib nya kemari seraya madahka nya pejal politik.

“Nadai pematut tauka diungkupka dalam undang – undang Malaysia ti madahka sukung ngagai Barisan Nasional deka mulaika ungkup Sarawak dalam Sempekat Malaysia MA63 kenyau ari kelia. Tu siti “pejal politik” sereta ulah ti enda bebasaka penuduk Sabah enggau Sarawak ti nyadi kaban kunsi numbuhka Malaysia”, ku Cobbold nengah penerang berita kemari.

“Menua ke bekaul dalam sempekat iya nya United Kingdom, Persekutuan Tanah Melayu (Malaya), North Borneo (Sabah), Sarawak enggau Singapura,” ku iya.

“Najib ukai sebuah menua, sapa madahka Najib enggau Barisan Nasional bisi dalam MA63? Iya semina Menteri Besai ti dikearapka ngatur menua Malaysia sereta dichiri Yang di-Pertuan Agong,” ku Cobbold nyindir.


“Ke deka ditemu kitai iya nya sentang ungkup ba kandang tasik lalu kitai rayat Sarawak deka nemu kati ku chara Malaysia mulaika ungkup kitai. Anang ila Perintah BN madahka PETRONAS ti salah,” ku Cobbold.

Cobbold mega minta Pakatan Harapan proaktif agi nyemaka mujur nguasa Putrajaya ba PRU14. Ku iya, ubah dibai PH nya beguna amat ngambika enda baka ke sebedau tu. — DayakDaily