SARIKEI, Mei 1: Kaban Kunsil Negeri Kuala Rajang ke mega Menteri Muda Perambu Mengeri, Pengatur Tanah enggau Rampa Menua, Datu Len Talif Salleh, madahka penyakal semina bisi dipeda maya pengawa bepilih aja, tang udah nya lesap nadai temu tunga.
Ku iya, ba pengawa bepilih kunsil negeri ke sebedau tu, iya disatup chalun penyakal tang udah lesap sepenembu pengawa bepilih nya.
Bida aku enggau iya nyengkaum semua pengari BN, kami tetap datai kitu laban nya pengawa kami.
“Kitai datai enda bemusim,” ku iya ba Program Ngirup Pagi Begulai enggau chalun BN Tanjong Manis, Yusuf Abd Wahab sereta peranak Bukit Kinyau, ditu kemari.
Ku Len, rayat anang mudah kena pelitik penyakal lalu beri meh sukung ngagai Yusuf di Parlimen Tanjung Manis ngambika iya ulih menang besai.
“Iya peranak asal ditu, siku ke bepelajar sereta mudah disemak.
“Iya mega ngembuan juluk kediri dikena ngemansangka sitak tu.
Len mega besemaya proses nyambung bekal elektrik ngagai kandang endur nya benung digaga lalu deka tembu sebedau Aidilfitri.
Kelimpah Bukit Kinyau, Yusuf mega bekimpin ngagai rumah panjai di Kerobong enggau Sare. — DayakDaily
