LIMBANG, Jan 10: Penanggul logistik enggau geografi entara batang kebuah pelilih Lawas patut diangkat nyadi bagi menua baru di Sarawak, pia ku Sapit Menteri Dagang Dalam Negeri, Koperasi enggau Pekara Bebeli Barang Datuk Henry Sum Agong
Ku iya, laban Lawas pelilih menua ke pemadu ujung sereta ngejang ari Sarawak, nya udqh ngenataika mayuh penanggul ba pekara nusun pengawa enggau pejalai rayat.
“Pelilih Lawas menua ke pemadu ujung sereta ngejang ari negeri Sarawak laban bisi pelilih Temburong di Brunei lalu tu udah meri penanggul ba pekara pejalai rayat ngaduka pengawa sida.
“Nya alai Lawas diangkat nya bagi menua tu deka ngemudahka rakyat sereta ngenyampatka transformasi pemansang di pelilih menua ke pemadu ujung di negeri tu,” ku iya.
Iya ke mega Kaban Parlimen Lawas madah, bemacham perambu udah ditusun ke pemansang pelilih Lawas.
“Kitai bisi mayuh agi perambu ungkup Parlimen Lawas dudi ila kelebih agi ba pengawa ngemansangka sektor ekonomi enggau infrastruktur ungkup rayat.
“Bela dikemeratka iya nya pemansang modal mensia ti dipeda beguna amat dikena nyukung pemansang dunya digital ke ditengkebang Ketua Menteri Datuk Patinggi Abang Johari Tun Openg,” ku iya. — DayakDaily
