SIBU, Feb 21: Presiden Parti Rakyat Bersatu (UPP) Dato Sri Wong Soon Koh kerejasama entara UPP enggau Parti Rakyat Bersatu Sarawak (SUPP) beguna amat dikena napi Pengawa Bepilih Besai Ke-14 (PRU14) ti deka datai.
Ku Wong, juluk deka ngambi pulai sitak Parlimen nya ulih dijapai nengah chara ngengkah chalun ke betul sereta ulih menang dikena ngiring bansa Cina nyingkang ke mua.
Iya pechaya penyerakup bansa Cina ulih ditegapka agi nengah chara ngarika Barisan Nasional (BN) ba renggat Parlimen.
Ku Wong, ansak Kepala Menteri Datuk Patinggi Abang Johari Tun Abang Openg sebedau tu ti dekaka UPP-SUPP bekerejasama, nerima respon ke positif ari ketuai enggau nembiak redak UPP.
Bejaku ba Pengerami Makai Lemai Taun Baru Cina 2018 diatur Gempung Gerempung Cina (UCA) Sibu ti digulu temuai dipebasa Abang Johari, Wong pechaya bansa Cina di serata Sarawak kelebih agi di Sibu arapka kerejasama UPP-SUPP teulihka pemujur ke besai agi.
“Bansa Cina ke lebih beserakup ulih begempung enggau komuniti bukai di negeri tu,” ku Wong ke mega Menteri Pekara Wangan Kedua enggau Menteri Dagang Entarabansa sereta e-Dagang.
Ba PRU13, ketegal pambar sitak majoriti Cina; Kuching, Pending, Sibu, Lanang, Sarikei enggau Miri diempu Parti Tindakan Demokratik (DAP). — DayakDaily
