KUCHING, Sept 10: Mandal Chairman DAP Sarawak Leon Jimat Donald keran meda sistem pelajar di nengeri tu diangkatmanah enggau lengkas.
Pengawa ngangkatmanah sistem nya ku iya mungkur pengawa mutarka isu begunan sekula ke udah repuk, perengka guna sekula enggau pekara bukai ke bekait.
Berindik enggau nya, iya udah nyuaka surat ke ngundan perambu ngemanah sistem pelajar ngagai Menteri Pelajar Dr Maszlee Malik ba penemuai menteri nya ke Sarawak bedau lama tu tadi.
Ngemata isu besekula di Pelilih Sri Aman, Leon ke mega Chairman DAP Sri Aman madah pansik sentang pekara nya bisi digaga ba sekeda raban pengajar ke ngajar di sekeda sekula ngelingi Sri Aman.
Di Sri Aman ku iya, pemanah pendiau (begunan enggau perengka guna) di empat sekula sekundari iya nya SMK Simanggang, SMB St Luke, SMK Melugu enggau SMK Engkelili meseti diperatika enggau berat.
“Sekeda nya, begunan endur nembiak bemalam enggau bilik kelas udah balat repuk lalu meseti dikemanah.
“Ba ikas sekundari tu mih pekara pelajar bala nembiak chukup berat.
“Sida meseti belajar ba sekula (begunan manah enggau perengka guna ke chukup) ngambi ulih ngiring sida nempa pemujur lalu ulih nampung pelajar ngagai renggat ke tinggi agi,’ ku Leon bejaku ngagai Dayak Daily.
Ngenang kaul ke sama, nitihka penerang ari orang ke ulih dipechaya, pendiau begunan endur nembiak bemalam di SMK Simanggang udah balat repuk.
Pekara nya udah suah dikerembai ba media rama tang mengkang enda diputar ijinsi ke megai tanggungpengawa.
Kelimpah ari nya, Leon mega minta Opis Pelajar ngaga bilik belajar tambah di SK Chung Hua Simanggang.
Ku iya, ukai semina bansa Cina ke nganjung anak sida belajar di sekula nya tang bansa Dayak enggau Melayu bisi mega besekula diak.
“Pekara tu ngujungka SK Chung Hua Simanggang nerima mayuh bala nembiak. Penyampau pengajar di sekula tu mega meseti ditambah.
“Diatu ‘ratio’ pengajar enggau nembiak ba tikas 1:50 lalu nya semina ba Primari 1 aja,”tambah Leon.
Entara sekeda isi surat ari 12 pekara ke dianjung ngagai Dr Maszlee, Leon nulis ba pekara ke 4 minta Opis Pelajar ngenankan Insititut Pematih Pengajar (IPG) Kampus Miri enggau Rajang.
Iya madah kededua IPG nya udah lalu seruran nyaup nempa raban pengajar ungkup sekula di Sarawak ngelama ke udah.
Dulu agi ari tu, Opis Pelajar ba maya perintah Barisan Nasional (BN) netapka pemutus diak kededua IPG nya ditutup lalu ditukar nyadi palan pematih teknikel enggau vokesyenal. — DayakDaily
