SIBU, Jan 30: Pengawa ngaga sekula kategori repuk di Sarawak patut dikejampat ngambika bala nembiak ulih belajar enggau lantang agi lalu pengajar mega nadai napi sebrang penanggul, pia ku Menteri Pelajar, Sains enggau Pansik Teknologi Dato Sri Michael Manyin Jawong.
Ku iya, sekula ke chukup infrastruktur enggau pemansang ulih nentuka penyulut prestasi sekula dalam akademik tauka kokurikulum
Ku Manyin, opis menteri serius beratika penanggul nya lalu ngansak Opis Menteri Pelajar enggau Opis Menteri Kereja Raya ngenyampatka pengawa ngaga sekula kategori nya di negeri tu.
“Ari 1,454 sekula di negeri tu, 70.2 peratus tauka 1,020 nya sekula kategori repuk.
“Ari 1,020 buah sekula nya, 415 buah dikelala sekula.ke repuk sereta begunaka bantu swreta patut dikemanah lengkas ,” ku iya.
Ku iya, nengah Langgur Pemansang Malaysia Lumpar Ke-11, 205 buah sekula repuk di negeri tu deka dikemanah lalu 210 buah agi deka nengah belanja RM1 bilion baka ke dibantai menteri besai maya Bajet 2018 ke sebedau tu. — DayakDaily
