KUCHING, 20 Jun: Presiden Parti Rakyat Sarawak (PRS) Tan Sri Dr James Jemut Masing madah pengari bebas Parlimen Lubok Antu Jugah Muyang bisi peluang diangkat nyadi chalun enti iya nyemilik PRS.
Berindik enggau nya, Masing ngarap Jugah ulih berunding nyemilik PRS ketegal sitak parlimen Lubok Antu sigi empu PRS.
“Kitai udah mai iya(nyemilik PRS) lalu awakka iya ngaga pemutus. Tang atur kitai mudah, Lubok Antu sigi penuduk PRS alai semina kaban PRS aja ke ulih nyadi chalun ba Lubok Antu.
“Tajapia, kepala menteri mengkang bempu kuasa ngaga pemutus,” ku Masing pengudah nyadi chairman Aum Kunsil Tinggi PRS ditu, seharitu.
Bedau lama tu tadi, Jugah madah ngagai DayakDaily diak iya bisi nerima surat kangau nyemilik PRS tang mengkang deka nyadi pengari bebas alai sebarang pemutus deka digaga ba maya ke ngena.
“Sigi amai aku bisi nerima kangau nyemilik PRS tang baka ke diatu aku lantang nyadi pengari bebas ke nyukung Perintah Besai Perikatan Nasional(PN) enggau Perintah Negeri Gabungan Parti Sarawak(GPS).
“Sebarang pemutus bekaul pekara nya deka digaga ba maya ke ngena,” ku Jugah.
Nitihka Jugah, pekara ke berat diatu iya nya mai pemansang ngagai rayat Lubok Antu ke mengkang tinggal ba pekara infrastruktur kelebih agi jalai alun, bekal lektrik enggau ai.
“Aku dipilih nengah tikit bebas, alai diatu(pengudah ningkilka diri ari Pakatan Harapan) manah agi mengkang nyadi pengari bebas,” ku Jugah
Ba Pengawa Bepilih Besai Ke 14, Jugah menang ba sitak parlimen Lubok Antu nengah majoriti 1,059 undi ngalahka calan BN-PRS Robert Pasang Alam enggau Nicholas Bawin Anggat(PKR). –DayakDaily.
