KUALA LUMPUR: Opis Menteri Kereja Raya nyambut manah Komiti Nagang Ulah Makai Suap Malaysia (SPRM) ti deka ngeluarka rintai nama 10 opis menteri ke pemadu mayuh nerima sebana bekaul makai suap enggau salah nguna kuasa ambis laun ujung taun tu.
Menteri opis nya, Datuk Seri Fadillah Yusof madahka singkang nya ukai aja ulih ngukuhka opis menteri enggau sekeda ejensi ari baruh nya tang mega ulih ngurangka ulah salah nguna kuasa enggau makai suap ba opis menteri bukai.
“Kami tebuka sereta semampai nyukung nama aja pengawa SPRM nagang pengawa makai suap asalka dipejalai nengah chara tebuka sereta bisi sistem ngemata ke ulih diterima semua.
“Enti rintai nama nya dipandangka ila, aku pechaya nya ulih nempa penyedar, besemekih ti ngujung deka neritka atur nyema bisi dirintai ba lis entara opis menteri ke jai prestasi lalu sida mega deka nguji ngemansutka diri ari rintai nya,” ku iya madah ngagai media pengudah bejadi ‘Konvensyen Juru ukur Bahan Antarabangsa 2017’ diitu kemari.
