PUTRAJAYA, Jun 28: Komiti Pemansang enggau Pengelikun Genturung Pendiau (JKKK) deka ditusun sereta diberi nama baru, iya nya Kaunsil Pengatur Komuniti Genturung Pendiau (MPKK), pia ku Menteri Pemansang Menua Pesisir, Rina Mohd Harun.
Ku iya, geran sepenyampau RM10,000 deka diberi ngagai tetiap MPKK di negeri ari baruh Pakatan Harapan (PH) enggau semua ungkup belanja nya enda ngelui ari RM100 juta setaun.
Ku iya geran nya deka meri pemaik ngagai 10,000 ari 16,481 genturung pendiau di serata Malaysia.
“Geran nya deka dikena ungkup program dikena ngerembaika penatai pemisi enggau ekonomi henturung pendiau sereta pemaik enggau pengelantang genturung pendiau,” ku iya ba aum media pengudah nyadi chairman aum baru kabinet Opis Menteri Pemansang Menua Pesisir (KPLB), ditu kemari.
Ku iya, mekanisme meri geran ngagai genturung pendiau di negeri Perlis, Kelantan, Terengganu, Pahang enggau Sarawak benung dipansik lalu dipelaba tembu dalam timpuh sebulan agi. — DayakDaily
