Jematan Btg Lupar, pemadu panjai di S’wak deka digaga taun baru

KUCHING, Okt 24: Jematan Batang Lupar dipelaba deka betengkah digaga taun bar, ngena ungkus belanja urung RM1 bilion, pia ku Kaban parlimen Batang Lupar, Dato Sri Rohani Abdul Karim.

Ku iya, nya deka nyadi jematan ke pemadu panjai di Sarawak lalu pemanjai jematan nya urung 4.5 kilometer ngagai lima kilometer.

“Nitihka perambu, jematan baru nya deka berengkah digaga ba taun 2018 ti begunaka timpuh beberapa taun baru ulih ditembu,” ku iya.

Rohani mega madah, jematan nya deka meraka Sungai Batang Lupar ke terus nyambung ngagai menua Sebuyau enggau Meludam ti lalu nyaup muka mayuh agi peluang ekonomi peranak ba kandang menua nya.

“Jematan tu meh ke lama endar udah dianti peranak menua ditu ke ngelama tu bepanggai ba servis feri,” ku iya.

Projek ngaga Jematan Batang Lupar dirintai ari baruh Projek Langgur Pemansang Malaysia Lumpar Ke-11 (RMK-11), lalu belanja dikena ngaga jematan nya udah dikemendarka. — DayakDaily