KUCHING, Okt 24: Sarawak patut chakah agi nempa orang ke landik bejaku Inggeris kelimpah pengelandik teknikal ba raban ke graduet di Sarawak.
Ku Kepala Menteri Datuk Patinggi Abang Johari Tun Openg, nya beguna amat dikena ngurangka penyampau raban graduet ke nadai kereja di negeri tu.
Ku iya, pengawa ngiring raban nembiak di sekula nguna jaku Inggeris enda chukup dikena ngenanka pemerat duna enggau ngangkatka standard jaku Inggeris.
“Nya alai, kitai meseti ngenyakahka agi pengawa ngangkatka penemu ba raban pengereja pengawa sereta meransang nguasa jaku Inggeris.
“Kitai meseti nempa orang ke landik ke ulih diterima dalam kompeni multinasional, enti enda, kitai semina ngadaka raban graduet ke nadai kereja,” ku iya.
Kepala menteri mega madah, ketegal nya Sarawak nguna jaku Inggeris nyadi jaku rasmi kelimpah jaku Malaysia di negeri tu.
“Nguasa jaku Inggeris enggau manah disempulang enggau pengelandik teknikal ba rayat Sarawak beguna amat dikena nentuka pemujur pemansang ekonomi digital di Sarawak,” ku iya. — DayakDaily
