KUCHING, June 29: Perintah Negeri merambu deka ngaga perengkaguna rel ari Lubok Antu ngagai Badau terus ke Tanjung Manis, dikena ngangkatka aktiviti ekonomi ba kandang menua nya.
Perambu nya udah dibantaika Kepala Menteri, Datuk Patinggi Abang Johari Tun Openg malam tadi nyadi sebagi ari pelin pemansang timpuh panjai negeri.
“Perambu nya dikearap nyadi penegap ekonomi kedua-dua menua sereta nempa gaya dagang entara garis menua.
“Nya deka nyadi jalai ekonomi Indonesia-Malaysia sereta meri peluang ngagai kedua-dua menua bebalas nyikap pangan diri ba pekara ekonomi enggau rama,” ku iya ba Pengerami ‘Malam Budaya Sarawak’ dikena ngenataika pengaga ati ngagai Konsul Jenderal Indonesia, Bapak Jahar Gultom ke deka pindah gawa ngagai menua bukai.
Sama bisi datai Menteri Dagang Temuai, Daya Pengidup, Art, Nembiak Lumba enggau Main Negeri Datuk Abdul Karim Rahman Hamzah.
Kena bulan April tu tadi, Abang Johari melabaka perambu nya deka dinamaka Borneo Railway, ke nyambung Sarawak, Sabah enggau Pontianak di Indonesia.
Perambu timpuh pa jai nya mega deka ngangkatka Tanjung Manis nyadi penyangkai kapal ke pemadu beguna di rantau tu.
Ngelansa pasal Konsul Jenderal Indonesia nya, Jahar berengkah gawa di Kuching dalam taun 2015, pengudah pindah ari Opis Konsul Jenderal di Vanimo, Papua New Guinea. — DayakDaily
