KOTA SAMARAHAN, Jan 7: Siti ari penanggul ke ditapi orang ti deriba ari Kota Samarahan ke bandar raya Kuching iya nya jalai sekut tiap pagi enggau lemai kelebih agi ari Hari Satu nyentuk Lima.
Pejalai nya begunaka timpuh lebih sejam.
Pekara tu majak mar kenyau lima taun ke udah lebuh mayuh rumah digaga ba kandang Samarahan, kelebih agi ba urung Universiti Malaysia Sarawak.
Kenyau beberapa minggu ke udah, penyekut nya majak balat lalu ngenusah penguna jalai alun berjndik ari pengawa ngemanah jalai di Tabuan Jaya, Stutong, Giant Supermarket enggau Sama Jaya Free Industrial Zone maya siang hari.
Penanggul nya balat diasai kelebih agi maya pagi enggau lemai laban maya nya mih orang mayuh mansang pulai ari endur gawa
Tebal agj penguna jalai alun nya minta pengawa ngemanahka jalai nya dikelengkas tauka digaga pengudah pukul 9 malam nyentuk 5.50 pagi.
Taja pia, penguna jalai alun ari kededua piak jalai nya minta atur ke manah agi dipejalaika nyengkaum ngaga mayuh agi jalai limpang ke bukai digaga dikena ngurangka penyekut nya ti dipelaba balat agi nya enti semua rumah udah siap tembu digaga dalam timpuh setaun dua agi. — DayakDaily
