Infrastruktur di Puncak Borneo majak manah

Deputy Minister of Energy, Green Technology and Water Datuk Seri James Dawos Mamit

KUCHING, Jan 7: Pemansang kelebih agi perengka guna enggau infrastruktur di Puncak Borneo diatu majak manah, pia ku Sapit Menteri Kuasa, Teknologi Gadung enggau Ai Datuk Seri Dr James Dawos Mamit.

Ku iya, kenyau ari iya nyadj Kaban Parlimen sitak nya, komitmen iya endang mai projek pemansang baka jalai alun, lekterik enggau ai beresi ngagai sitak nya ke pengelantang rayat.

“Udah mayuh pemansang digaga ba sitak Parlimen Puncak Borneo kenyau aku nyadi Kaban Parlimen sitak tu.

“Aku enda rindu bemain politik. Nyadi pengari rayat, fokus aku iya nya gawa ke rayat enggau menua,” ku iya lebuh bejaku bejadi program “Kembali Ke Sekolah” begulai enggau Tenaga Nasional Berhad (TNB) ba Dewan Mayuhguna Tiang Bukap ditu kemari.

Ba program nya bisi 300 iku nembiak sekula primari ngelingi Puncak Borneo nerima bantu kereban sekula beserimbai enggau program nya ti dipelanja TNB.


Nengah awak nya Dawos lalu ngelalau apai indai ngemeratka pelajar sekula anak sida laban nya ngubah sereta ngangkatka tikas pengidup sida jemah.

Ku iya, perintah semampai fokus ba bidang pelajar nengah chara nyendia pelajar enda bebayar ba renggat sekula primari enggau sekondari, kelimpah meri sekularsip enggau duit jali ba renggat pelajar tinggi.

Iya mega meransang apai indai ngambi peluang nya beratka pelajar ngagai anak sida nyentuk ke renggat universiti.

Sama bisi ba pengerami nya, Menijar Besai ( Pengerembai Kaul enggau Pekara Dalam Opis) TNB Datuk Omar Sidek. — DayakDaily