KUCHING, Okt 24: Presiden Parti Bansa Dayak Sarawak Baru (PBDSB) Cobbold John minta kededua Perintah Besai enggau Negeri bebasaka Institut Adat Dayak.
Ku iya, isu bayar elawin ketuai pupu bansa dipetalat, dikerebut Pakatan Harapan (PH) enggau Gabungan Parti Sarawak(GPS).
“Perintah Negeri dibaruh GPS enggau Perintah Besai dibaruh PH lalu enda teulih ka buah runding sereta penemu ke segala bekaul enggau bayar elawin Ketuai pupu bansa.
“Bepun ari bulan Mei tu tadi, perintah GPS madahka diri nampung bayar elawin Ketuai pupu bansa ninting bulan datai ka seharitu.
“Penerang berita baka ke dipansut Sapit Kepala Menteri Datuk Amar Douglas Uggah madah Perintah Besai enda mayar elawin sida tu. Uggah mega madah Pengulu enggau Temenggong dipaduka ari politik,” ku Cobbold nengah surat penerang berita seharitu.
Ngenang kaul ke sama, Cobbold madah PH Sarawak enda lantang enggau pemutus GPS nagang raban ketuai pupu bansa datai ngulu program ke diatur Perintah Besai.
Chairman Parti Keadilan Rakyat (PKR) Baru Bian ba minggu ke udah madah Perintah Besai deka mayar elawin nya berengkah 2019.
Tajapia, Baru netap bayar nya semina ungkup raban ketuai bansa ke dipilih rayat lalu ukai dichiri ari pekara politik.
Ku Cobbold, Perintah Besai nengah Baru ke mega Menteri Kereja Raya madahka 70 peratus elawin ketua pupu bansa deka dibayar perintah besai lalu laluh 30 peratus dibayar perintah nengeri.
Iya (Baru) mega nangkan Tuai Rumah ti dipaduka nengah kuasa politik deka diketu ka ari nerima elawin.
Berindik enggau nya Cobbold deka betanya sekalika kededua perintah tu sama bela berebutka tuai rumah alai sekalika tuai rumah dipilih peranak rumah panjai?
“Kenu ku GPS, PH ngepun ka duruk dulu. Nama kaul duruk ngetu ka elawin enggau ulah nagang ketuai pupu bansa ngulu program PH?
“Ordinan “Ketua Kaum & Ketua Masyarakat 2004″ enda dipebasa ka agi”? Alai kededua perintah beambi ulih ari institusyen adat,” ku Cobbold seraya madah adat enggau meruah ketuai pupu bansa dipelita. — DayakDaily
