MIRI, Mac 12: Barisan Nasional (BN) pechaya isu royalti minyak ti deka dibantaika Pakatan Harapan (PH) ba Pengawa Bepilih Besai ke-14 (PRU14) enda ngeruga sentimen pengundi Sarawak.
Sapit Kepala Menteri Datuk Amar Douglas Uggah Embas madahka isu mulaika 20 peratus royalti minyak ngagai Sarawak nya isu lama ke dikena penyakal baru.
“Nya cherita lama, nengah kuasa penuh ti diberi ngagai perintah negeri ungkup industri minyak enggau gis di negeri tu, kitai deka bulih untung ke mayuh agi ari 20 peratus,” ku iya madah ngagai pemberita pengudah bejadi program “Rabies Mass Vacination” renggat Bagi Menua Miri ditu kemari.
Uggah ke mega Sapit Presiden Parti Pesaka Bumiputera Bersatu (PBB) pechaya pengundi ulih berati kediri empu bemacham pengawa digaga perintah diatu kelebih agi bekaul mulaika hak Sarawak baka ti diungkup dalam konstitusyen.
Kena Hari Dua minggu siti nyin tadi, Kepala Menteri Sarawak Datuk Patinggi Abang Johari Tun Openg madahka Sarawak deka nguasa penuh industri minyak enggau gis di negerj tu ke mega sebagi ari mulaika kuasa ari perintah besai.
Ku Abang Johari, pengawa mulaika kuasa nya setipak enggau pekara ti udah dipesetuju Menteri Datuk Seri Najib Tun Razak untuk Sarawak nitihka ti udah diungkuo dalam Sempekat Malaysia 1963 (MA63) ti enda sengaja beberapa taun ke udah, pia ku Abang Johari.
Kepala Menteri madah, pengawa numbuhka Petros sereta bejalaika hak konstitusyen ari baruh pekara 2(c) Rintai Negeri enggau 8(j) Rintai Perintah Besai baka ke diungkup dalam Tusun Kesemilan Konstitusyen Perintah Besai endang asil randau mulaika kuasa entara perintah negeri enggau perintah besai.
Chairman PH Sarawak Chong Chieng Jen empai lama udah besemaya ngungkupka tujuh batang pekara dalam Manifesto Sarawak ungkup rayat negeri tu ba PRU14 sereta mulaika royalti minyak 20 peratus ngai Sarawak ngagai Sarawak enggau Sabah.
Kelimpah royalti minyak, Chong mega madahka Pakatan Harapan deka meri 50 peratus ari chukai ke diulih nya diberi ngagai Sarawak, ngapuska Chukai Barang enggau Servis (GST), ngenanka Bantu Rayat 1Malaysia (BR1M), negapka rega minyak sereta mulaika subsidi petrol. — DayakDaily
