Intu pengerami Gawai begulai enggau semua pupu bansa — Taib

Tun Pehin Sri Abdul Taib Mahmud. - file pic

KUCHING, Jun 1: Pengerami ke mayuh macham diintu di Sarawak mandangka ulah kemerah pupu bansa di negeri ini maya ngerami sesebengkah pengerami.

Yang di-Pertua Negeri Tun Pehin Sri Abdul Taib Mahmud ba pesan Gawai Dayak madah, kaul ba mayuh bengkah pupu bansa ulih ditanggam nengah chara mai semua orang ke dikelala sida enggau sama ngintu pengerami nya.

Ku iya, Sarawak sebuah negeri ti mujur ngemeranka adat enggau chara pengidup ngelui ari seratus taun tanpa ke nadai penyarut taja pan ngembuan pupu bansa ke bebida daya pengidup enggau jalai pengarap.

“Tu meh siti pengelantang ti ulih dipandang nyadi pemaik enggau penyiru rayat Sarawak,” ku iya.

Ku iya baru, pengerami Gawai Dayak sebengkah pengerami ti mai semua pupu bansa berami kelimpah ngerapitka tanggam kaul enggau irang bukai.


Penyerakup pupu bansa ke majak tegap ba rayat Sarawak ngerichahka agi pengerami enggau pengelantang ke udah ditampung sida kenyau ari kelia menya, ku iya. — DayakDaily