Bisi 300 iku nembiak nerima bantu kereban sekula ari TNB

Classroom. — DayakDaily.com file pic. // Photo: Pixabay

PUNCAK BORNEO, Jan 7: Bisi 300 iku nembiak ari enam buah sekula nerima bantu kereban dikena besekula beserimbai enggau Program ‘Kembali Ke Sekolah’ ti dipelanja Tenaga Nasional Berhad (TNB).

Sida tu bala nembiak ke beumur tujuh ngagai dua belas taun ari SK Pangkalan Kuud, SK St Peter Simpok, SK Pesang Begu, SK Sira Krian, SK Gayu enggau SK Subang.

Bantu nya udah disuaka Sapit Menteri Kuasa, Teknologi Gadung enggau Ai ke mega Kaban Parlimen Puncak Borneo, Datuk Seri James Dawos Mamit.

Menijar Besai (Pengerembai Kaul enggau Pekara Dalam Opis) TNB Datuk Omar Sidek lebuh ke bejaku ba pengerami nya madahka inisiatif nya sebengkah ari tanggungpengawa rama korperat (CSR) TNB, iya nya mantu meri kereban besekula ngagai orang ke suntuk.

Ku iya, bantu ke diberi nya baka pekayan sekula nyengkaum kasut enggau stokin sereta beg sekula ke beungkus RM 60,000.


Ku Omar, bisi 4,800 iku nembiak di serata menua bela ampit bantu nya taun siti nyjn tadi ke beungkus RM 1.2 juta lalu taun tu mungkur 10,000 iku nembiak ke beungkus RM 2 juta.

Berebak enggau nya, Ketuai Genturung Pendiau Stabut, Martin Sirip,66, meri terima kasih ngagai TNB laban udah ngatur inisiatif CSR nengah program nya ke ukai semina ngelempung tating belanja apai indai tang mega ngagaka ati bala nembiak ti nerima bantu nya. — DayakDaily