BETONG, Mac 10: Industri getah Sarawak deka dikemansang enggau teatur sereta manah agi nitihka Pelin Besai Industri Getah, pia ku Sapit Kepala Menteri Datuk Amar Douglas Uggah Embas.
Ku iya, nya dikena ngisi peminta ngambika Menua Malaysia kurang agi bepanggai ba import barang mata.
Ku iya, Malaysia pengeluar sarung jari getah ke pemadu besai di dunya tang ngimport tusu getah ari menua ke besemak laban pemansut menua tu enda chukup.
Ku iya, getah ke ditangkal di Sarawak semina manah digaga nyadi getah SMR, tang pun getah nya enda tau digaga perabot.
“Diatu kitai bisi 165,000 hektar getah. Sekeda nya udah diputung tang di Sarawak lebuh kitai nanam baru, chara kitai iya nebang lalu batang getah nya diteju pia aja, tang di Semenanjung batang getah nya nyadi penatai pemisi laban ngembuan rega ke tinggi ti tau digagaka perabot,” ku iya.
Ku iya baru, kitai agi bisi tanah ke besai lalu dalam timpuh 10 taun ke deka datai kita deka nambahka 200,000 hektar agi.
“Kitai deka ngeluarka getah SMR, tusu getah lalu pun getah nya tau digaga nyadi perabot,” ku iya. — DayakDaily
