PUTRAJAYA, Ogos 29: Ikan tilapia di Malaysia selamat diempa laban orang ke nupi ikan di menua tu ngemeranka chara nupi ke manah setipak enggau garis lalau Chara Akuakultur Ke Manah ti dikeluarka Opis Berikan (DOF).
Ketuai Direktor Opis Berikan Malaysia, Datuk Munir Mohd Nawi madah, sida udah bejalaika pengawa ngemata ari baruh Program ‘Pemantauan Residu Akuakultur’ (ARMP) enggau ‘Sanitary and Phytosanitary’ (SPS) ti dipejalaika belama, lalu nyentuk ke diatu sida tetemuka nadai penanggul nguna pemakai ke dichampur hormon enggau agen meransang ikan jampat besai ti dikemeranka di Malaysia.
“Nyentuk ke diatu 1,059 palan nupi ikan di serata Malaysia udah diperesa dikena nentuka ikan nadai kena pengamah nya sereta selamat diempa,” ku iya ba sebengkah penerang ditu nyaut isu bekaul enggau siti video “Tiga Kebuah Kebuah Kita Patut Ngetu Makai Ikan Tilapia” ti dikerembai baru-baru tu.
Video nya madahka enti makai ikan tilapia, nya deka nambahka risiko ‘keradangan’, laban ngembuan utai kamah ke dikumbai karsinogenik ke tau ngasuh nyadi penyakit riman, kelimpah mega bisi ngundan antibiotik enggau rachun indu utai.
Ku Munir, nadai pansik ke nyengala sereta riput khusus ari seraku tauka gerempung pengerai mensia mayuh ti madahka mensia ke makai ikan tilapia ti diberi pellet ke ngundan soya enggau jagung ti diubah nengah chara genetik (GM) deka nambahka risiko ‘keradangan’ enggau penyakit riman.
Ku iya, pengawa nguna protein utai tumbuh baka soya enggau jagung GM dikena nyilih pemansut protein pemakai ikan udah dikemendarka opis bekuasa Norway enggau Gempung Eropah kenyau ari 20 taun ke udah. — DayakDaily
