Gaya hari ti angat sereta rangkai dijangka berubah dalam timpuh dua minggu agi

Weather vane. — DayakDaily file pic. // Photo: Pixabay

KUCHING, Ogos 29: Gaya hari ti rangkai sereta angat ke ditapi negeri Sarawak diatu dipelabaka deka berubah dalam timpuh dua minggu agi.

Gaya hari tu nyadi baka nya ketegal ubah puput angin monsun Barat Daya.

“Gaya hari deka berubah enti udah betukar ngagai Monsun Timur Laut ba tengah bulan September,” ku Sapit Direktor Opis Meteorologi (Met Malaysia) Pampang Sarawak, Siniarovina Urban Sinyaw.

Ku iya, Sarawak diatu benung ba renggat monsun Barat Daya.

“Ba pekara nya, puput angin barat daya deka ngasuh bungkur remang kurang di menua kitai, kelebih agi di barat Sarawak sereta tebal agi ba kandang menua di utara Sarawak.


“Gaya hari nya mega deka ngasuh sekeda kandang endur nyadi kelalu rangkai nyentuk ke nyadi mudah angus nyengkaum di Baram, Miri.”

Ku iya, taja pan bisi tumpuk ujan enggau kabut mit tungaka Barat enggau menua pesisir Sarawak, nya enda ulih mutarka gaya hari ti rangkai di negeri itu.

Enti udah ngalih ngagai renggat Monsun Timur Laut ke dijangka nyadi tengah September nyentuk November, gaya hari di negeri tu dipelaba betukar ngagai ujan bangat enggau kabut sereta biau balai. — DayakDaily