Helikopter ke mai siku menteri sangkai ngenyit kemari

Helicopter — DayakDaily.com file pic. // Photo: Pixabay

BINTANGOR: Menteri Opis Menteri Kandang Menua enggau Pengawa Berumah Sarawak, Datuk Dr Sim Kui Hian, betapi enggau pemar kemari lebuh helikopter ke ditepan iya ari Kuching ke Sibu, betempuh enggau gaya hari ti chukup jai.

Ketegal nya, helikopter ke ditepan Dr Sim enggau empat agi penumpang enggai enda pan sangkai ngenyit ba padang Kaunsil Pelilih Julau enggau Meradong, urung 1.30 tengah hari kemari.

Iya lebuh dikerandau pemberita madah, lebuh sida bekejang ari Kuching urung pukul 1 tengah hari, gaya hari chukup manah tang bebali jai ngujungka ujan bangat sereta kabut lebuh ke nengah ruang langit Bintangor.

“Kami semua selamat, pilot ngaga pilih ke betul ngambi pemutus sangkai dikena nyeliahka risiko nyema agi majakka penerebai nya,” ku iya.

Presiden Parti Sa’ati Rakyat Bersatu Sarawak (SUPP) nya madah, iya enggau raban iya udah nya lalu nampung pejalai ke Sibu nepan kerita sereta selamat datai di Sibu urung pukul 2.30 ngalih hari.