KOTA KINABALU: Perdana Menteri Datuk Seri Najib Tun Razak ngenukuka hak Sabah enggau Sarawak deka majak diintu dalam Perintah Besai Malaysia kelimpah nentuka rayat kededua nengeri enda dichiping nitihka pematut.
Ku iya, siti komiti endang semina ungkup bejalaika pengawa mansik hak orang Sabah enggau Sarawak mega udah ditumbuh dikena nentuka hak enggau pemerat ba kededua buah nengeri dipantup bepelasarka Sempekat Malaysia 1963.
“Kitai deka berunding dalam sebuah ruang bilik. Enda ibuh ngaga slogan ‘Sabah for Sabah’, ‘Sarawak for Sarawak’. Kita dekka ‘Sabah for Malaysia’ lalu ‘Malaysia for Sabah. Nengah chara nya, kitai (Malaysia) ulih maju.
“Pemutus (komiti khas) deka digaga enda lama agi ngambika ngagih hak rayat Sabah enggau Sarawak,” ku iya bejaku lebuh bejadi ngintu Hari Malaysia 2017 tikas menua di Kompleks Sukan Likas, ditu, malam tadi.
Ku Najib, Perintah Besai tetap bebasaka pemutus Sabah enggau Sarawak sereta Semenanjung ke udah setuju begempung enggau Semenanjung numbuhka Malaysia.
Iya mega madah, perintah Besai semampai komited deka ngurangka sereta ngapuska seraka pemansang entara Sabah, Sarawak enggau Semenanjung dikena nentuka pemansang ba kededua buah nengeri tu sebaka enggau nengeri bukai.
Sama bisi ngulu pengerami nya,Yang Dipertua Nengeri Sabah, Tun Juhar Mahiruddin, Sapit Menteri Besai, Datuk Seri Dr Ahmad Zahid Hamidi, Kepala Menteri Sabah, Tan Sri Musa Aman, Speaker Kunsil Nengeri Sarawak, Datuk Amar Mohamad Asfia Awang Nassar, ngarka Petintah Sarawak, Menteri Komunikasyen enggau Multimedia, Datuk Seri Dr Salleh Said Keruak sereta bala ketuai Perintah Besai enggau perintah nengeri Sabah sereta Sarawak.
