KUCHING, Julai 23: Gabungan Parti Sarawak (GPS) diatu nyadi platfrom manah agi sereta tegap dikena ngenataika sada rayat sereta nadai tatak dikena nyaga pemaik negeri tu, ku Kepala Menteri Datuk Patinggi Abang Johari Tun Openg.
Abang Johari ti nyadi ketuai gempung empat parti nya madah, Sarawak enda ibuh pansut ari Malaysia laban lebuh dalam Malaysia ukai reti rayat enda tau nuntut hak sida baka ke bisi dalam Sempekat Malaysia 1963 (MA63) enggau Konsitusyen Perintah Besai.
“PRU14 udah tembu lalu kitai semua nemu perintah baru di Putrajaya udah ditumbuhka. Menteri Besai Tun Dr Mahathir Mohamad maya di Kuching empai lama udah nemuai keterubah ke Sarawak pengudah nyadi Menteri Besai.
“Kitai temegah amat ati lebuh Dr Mahathir di Kuching ke alai udah meri penemu sentang semua gaya pemansang di Sarawak,” ku iya lebuh bejaku ba Hari Medeka Sarawak 2018 di Dataran Perayaan, Jalai Stadium ditu kemari.
Abang Johari madahka penatai Dr Mahathir mandangka GPS udah mujur nempa kaul ke rat enggau perintah besai taja pan bebida penemu ba politik.
“Sarawak begunaka perati perintah besai belama dikena nentuka pemansang bisi belama ungkup rayat negeri tu.”
Ku Abang Johari, keterubah tu Sarawak puas ati enggau semaya dalam Malaysia ti udah dititihka. — DayakDaily
