KUCHING, Jun 23: Komiti teknikal numbuhka Gabungan Parti Sarawak (GPS), pechaya siti entiti politik baru ari parti-parti Sarawak ti pansut ari Barisan Nasional (BN) kena Jun 12 tu tadi berindik ari BN udah alah ba pengawa bepilih besai baru-baru tu, melabaka deka dilanchar enggau rasmi kena Julai 22 tu.
Aum komiti nya bechairmanka Sekretari Besai Parti Pesaka Bumiputera Bersatu Sarawak (PBB) Datuk Alexander Nanta Linggi ba indu opis parti PBB ditu sehari tu, digulu tiga iku agi sekretari besai parti komponen gempung nya ari Parti Rakyat Sarawak, Parti Rakyat Bersatu Sarawak enggau Parti Demokratik Progresif kelimpah beberapa pakar ba undang-undang.
Nanta madah, komiti teknikal sehari mangku pengawa mantaika siti agi komiti protem nunbuhka GPS sereta ngaga logo baru ke gempung nya, kelimpah nulis surat ngagai Dewan Rakyat madahka parti-parti nya enda agi begulai enggau BN enggau surat ngagai BN meri terima kasih ngagai kerejasama ke sebedau tu.
“Komiti protem nya ila deka diarika lapan iku iya nya presiden enggau sekretari besai keempat-empat parti nya,” ku iya madah ngaga pemberita pengudah nyadi chairman aum komiti teknikal nya sehari tu.
Ku iya, ba pengawa ngaga logo, siti pekit ngaga logo GPS dibuka ngagai mensia mayuh berengkah ari pagila lalu rintai silik sentang atur perais deka diiklankan ba surat berita negeri tu. — DayakDaily
