George Chan sanggup nyaup Dr Sim ngempung bansa Cina di Sarawak

Sarawak United Peoples' Party (SUPP) logo

KUCHING, Feb 17: Ex-Presiden Parti Sa’ati Rakyat Sarawak (SUPP) Datuk Patinggi Tan Sri Dr George Chan Hong Nam meri sukung penuh ngagai Presiden SUPP, Datuk Dr Sim Kui Hian ke deka nyerakup pupu bansa Cina di Sarawak ngambika bisi kering sada dikena nampung randau bekaul enggau Sempekat Malaysia 1963 (MA63).

“Nyema dipinta, aku nyanggup nyadi orang tengah entara dua raban dalam parti (SUPP) enggau penyakal ngambika bansa Cina ulih berakup dalam politik,” pia ku iya lebuh dikerandau ba Pengerami Nyambut Temuai Taun Baru Cina kemari.

Berebak enggau nya, Dr Sim, ba pengerami nya pechaya parti iya ulih menang ambis nadai tujuh kerusi ti diungkup ngagai Pengawa Bepilih Ke-14 (PRU14).

Ku iya, kerusi nya ulih nyaup ngeringka negeri ba randau tauka ngulih hak negeri ari Putrajaya.

Taja pan enam ari tujuh kerusi nya kitai udah alah ba jari penyakal ba pengawa bepilih ke sebedau tu, tang iya pechaya ba pengawa bepilih ke sekali tu parti iya ulih tetemuka pemujur.

Ngambika juluk deka ngulihka pulai tujuh kerusi nya ulih dijapai, iya ngelaluka ex-kaban parti ke udah nyereta penyakal kelebih agi DAP pulai ngagai parti dikena ngering lalu nyerakup dalam parti awakka sebaka enggau komuniti bukai ke udah nyukung Barisan Nasional (BN).

“Sarawak meseti menang maksimum 31 kerusi ba parlimen ngambika bisi kuasa ke manah agi berandauka kuasa dikena ngulihka hak ke udah lenyau suba. Kitai meseti nyaga hak Sarawak,” ku iya seraya madahka SUPP udah ngaga pemutus ba rintai ke penudi chalun parti ungkup PRU14. — DayakDaily