Gawai diintu diri sebilik aja, anang pulai ke menua, anang ngabang sereta anang begelumu ba ruai


KUCHING, 25 Mei: Pengerami Gawai Dayak 2021 semina tau diintu diri sebilik aja ketegal pandemik Covid-19 sereta Atur Pemindah Betagang ti Belebas (PKPB).

Berindik enggau nya, rayat Sarawak kelebih agi bangsa Dayak dilalau anang pulai ke menua tauka rumah panjai ungkup sida ke diau di negeri sereta anang ngabang ngagai pangan diri.

Ungkup sida ke diau di rumah panjai, jaku lalau anang begelumu ba ruai sereta anang nyabung meseti dititihka enggau terit iya nya nitihka SOP ti udah ditetapka Komiti Pengintu Penusah Ngenyit Negeri Sarawak(JPBNS).

“Manah agi kita diau di rumah enggau likun lalu anang mindah antara pelilih menua,” ku seraban orang ke landik ba pekara pengerai nengah siti surat penerang berita begulai seharitu.

Rabannya diarika Dr Johnny Pangkas, Dr Eunice Melissa, Gabriel Alex is sereta Opis Pengerai Sarawak.


Dalam taun 2020 tambah sida, pandemic Covid-19 tu tebal agi nyadi ba kandang nengeri di Sarawak ditu, tang dalam taun 2021 virus nya nyau udah balat ngelekai ngagai menua pesisir nyengkaum di rumah panjai.

“Ke diatu penyampau rumah panjai ke bisi udah kena dalam Atur Pemindah ti Diteritka (PKPD) nyau majak nambah.

“Penyampau kluster di menua Sarawak mega majak nambah. Tebal agi kluster tu nyadi bepun ari orang ti enda nitihka SOP baka begelumu bebala mayuh, pengawa ngintu Hari Pengada, pengerami nikah, penusah
rabat sereta pemindah antara pelilih menua.

“Semua pengawa tu ngujungka dalam tiap-tiap kluster ti nyadi nya, tau ngelekai ngagai beratus iku mensia,” ku sida.

Nengah surat penerangnya mega, sida madah dalam dua tiga bulan ke udah
penyampau kes Covid-19 majak niki enti dibandingka enggau timpuh ke sebaka dalam taun 2020.

Ari bulan Januari ngagai April 2021, bisi 152 iku orang udah bebadi nyawa ketegal penyakit tu.

Nambahka nya, dalam timpuh dua tiga minggu tu menua Sarawak bisi udah ngerikod antara 300 ngagai 600 kes dalam sehari.

“Katil ke bisi di hospital ke patut alai orang ti sakit rama nyau diungkupka ngagai sida ti kena penyakit Covid-19.

“Katil ke disediaka ba wad ICU nyangka enda chukup agi enti pemayuh kes nyau majak nambah,’ku sida.

Nerangka enggau silik, sida madah atur nagang diri arika mindah kin kitu maya Gawai ulih nulung ngurangka risiko Covid-19 berampit sereta ngelekai ngagai orang bukai.

Sida pechaya, atur dikena nyeliahka sereta nagang penyakit tu ngelekai ukai semina pengawa agensi perintah aja tang mega patut nyadi tanggungpengawa semua kitai.

“Semua kitai patut ngembuan tanggungpengawa nyaga pengerai diri sereta sama-sama kitai nyeliahka penyakit tu ari ti ngelekai,” ku sida. — DayakDaily