![Baru_Bian](https://i0.wp.com/dayakdaily.com/wp-content/uploads/2018/07/Baru_Bian-e1531198869245.jpg?resize=696%2C464&ssl=1)
KUALA LUMPUR, Julai 26: Mekanisme enggau pengawa ngaga semua projek Jalai Besai Pan Borneo fasa 2 ba renggat nyerenih teknikal lalu deka diputuska begulai enggau Opis lengkas Menteri Wang sereta Perintah Negeri Sabah enggau Sarawak.
Menteri Kereja Raya, Baru Bian madahka projek Jalai Besai Pan Borneo Sarawak meri empas ke besai ngagai negeri enggau rayat nya nyengkaum ari sukut pemansang sosioekonomi, nya kebuah meseti diserenih silik agi.
“Nengah projek fasa satu, pengawa ngaga jalai besai nya mungkur jalai ari Teluk Melano nyentuk ke Miri ke ngaul 11 pakej enggau anggar sepenyauh 786 kilometer dalam proses ngaga nya.
Pengawa ngaga fasa dua projek jalai besai nya ari Limbang ke Lawas dalam renggat diserenih ari sukut belanja,” ku iya nyaut tanya Datuk Seri Fadillah Yusof (PBB-Petra Jaya) sentang status projek Lebuhraya Pan Borneo Sarawak Fasa 2, ba aum Dewan Rakyat kemari.
Baru madah Projek Jalai Besai Pan Borneo Sabah mega mungkur kereja ngangkatmanah jalai besai ke udah bisi ngagai empat lurung pulai mansang sepenyauh 706 kilometer nyengkaum ngaga fasa satu projek ngaga jalai besaj nya ke dibagi ngagai 35 pakej. — DayakDaily