Fadillah ngenukuka diri bepilih ngerebut pangku pengawa Mandal Kanan Presiden

Datuk Seri Fadillah Yusof

KUCHING, Feb 1: Menteri Kereja Raya, Datuk Seri Fadillah Yusuf ngenukuka diri enggau bepilih ngerebut pangku pengawa Mandal Presiden Kanan Parti Pesaka Bumiputera Bersatu (PBB) nyema dichalun ari renggat nembiak redak.
“Nya tepulai nyema bisi dichalun lalu aku udah sedia ngangkatka diri ngagai penuduk nya,” ku iya lebuh dikerandau ba Pengerami Berandau Duduk Betunga Mua Pan Borneo kemari.

Fadillah ke mega Kaban Parlimen Petra Jaya, nyadi Ketuai Nembiak PBB Negeri, udah madahka diri enda ngetanka pangku pengawa nya agi.

Iya sebedau tu, ngambi pangku pengawa Ketuai Nembiak ari Datuk Gramong Juna ba taun 2007.

Taja pan mayuh orang melabaka Fadillah deka disatup Menteri Dagang Temuai, Art, Main Asal, Nembiak Lumba enggau Main, Datuk Abdul Karim Rahman Hamzah, tang iya empu madah semina deka ngerebut pangku pengawa Mandal Presiden. Abdul Karim siku ari kaban Kaunsil Besai PBB Negeri.

Kaunsil Besai PBB ditetapka baum sehari tu, hari ke penudi nganjung nama chalun ungkup semua pangku pengawa.

Pangku pengawa Mandal Presiden Kanan nya puang pengudah kedua-dua penyandang, Datuk Amar Douglas Uggah Embas ungkup pampang Pesaka enggau Datuk Amar Awang Tengah Ali Hasan ungkup pampang Bumiputera dipesetuju ngenukuka pangku pengawa Sapit Presiden ke dipangku seduai diatu.

Pangku pengawa Ketuai Nembiak ti ditinggalka Fadillah dipelaba diisi Gerald Rentap Jabu lalu Ketuai Indu ti ditinggalka Puan Sri Empiang Jabu, dipelaba disandang Datuk Seri Fatimah Abdullah.

Gempuru Besai PBB deka berengkah Feb 8 tu ila. — DayakDaily