600 lutur dianjung gawa ba sepital S’wak, Sabah

A stethoscope. - DayakDaily.com file pic. // Photo: Pixabay

MIRI, Feb 1: Bisi 4,800 lutur pakar diengkah ba semua sepital nyengkaum di Sarawak enggau Sabah naka ke diatu.

Berebak enggau nya, Opis Menteri Pengerai Malaysia (KKM) netapka 600 lutur pakar enggau bukai ke baru pas dianjung ngagai Sarawak enggau Sabah.

Sapit Menteri Pengerai Datuk Seri Dr Helmi Yahaya madahka KKM nemu pengurang lutur pakar, nya alai sida nambahka lutur pakar enggau lutur bukai sechara berenggat dikena nangkup guna pesakit.

Naka ke diatu sepital besai di Kuching, Sibu enggau Miri bela bisi lutur pakar ke alai Miri ngembuan 15 iku lutur pakar major lalu kelebih nya pakar minor.

Ungkup Sepital Besai Miri KKM merambu ngaga siti blok tambah ba wad perubat.

Helmi ba penerang iya madahka KKM sedia ngangkatmanah perengkaguna klinik ba menua pesisir Sarawak nundaka spesifikasi Klinik Pengerai Tikas 7 ke digaga nengah chara berenggat di menua pesisir.

Helmi bejadi Pengerami Begulai enggau raban Komiti Temuai Sepital enggau Panel Penyanding Penemu Klinik Pengerai (PPKK) Zon Utara, nyuaka agih belanja PPKK RM10,000 ngagai lima buah sepital.

Berebak enggau nya, 41 buah agi Klinik Pengerai sama bela bulih agih belanja RM5,000.

PPKK dilanchar kena 1995 enggau tuju nerenak kerejasama ba raban perubat enggau mensia mayuh.