KUALA LUMPUR, Jun 20: Gempung Eropah (EU) kena Hari Empat nyin tadi udah setuju matak pulai tagang nguna minyak sawit dalam biofuel berengkah ari taun 2021.
Ketuai Pegawai Eksekutif Kaunsil Minyak Sawit (MPOC), Datuk Dr Kalyana Sundram madah, pemujur nya ngubah runding EU nya nyengkaum ansak ari Malaysia enggau menu pengeluar minyak sawit bukai ngambika gempung nya matak pulai tagang ke meri empas ba menua nya.
Gempung nya diarika Parlimen, kaunsil Eropah enggau Komiti Eropah.
Kena April 2017, EU udah ngemendarka resolusi nya laban kenu ku tagang nya beguna ke penegap rampa menua global.
EU meri kebuah komoditi ti diguna mayuh nya deka meri empas ba juluk Eropah deka negapka untuk sektor perengka pengangkut sida enti dikena nyadi biodiesel.
Nyadi pengeksport minyak sawit ke pemadu mayuh di dunya, Malaysia enggau Indonesia deka nerima impek ari atur nya.
“Berengkah ari tagang nya diteritka, EU nerima bemacham ansak enggau bantah ari menua pengeluar minyak sawit kelebih agi Malaysia enggau Indonesia,” ku iya.
“Pengujung iya sida matak pulai tagang nya lalu MPOC sereta semua rayat menua tu ngelaluka pemutus matak pulai tagang nya lalu pemutus nya sida digaga ba maya ke patut,” ku iya.
Iya bejaku munyi nya ba sebengkah aum media di Wisma Sawit, MPOC Kelana Jaya ditu ensana. — DayakDaily
