KUCHING, Jun 20: Edisi keempat Festival Tagang Antarabansa Semadang deka diatur ari Ogos 31 ngagai Sept 2 tu ti dipelaba richah agi enggau penambah main ba pengerami nya.
Festival nya ke diatur begulai Komiti Sistem Kpg Semadang Tagang enggau Opis Betanam Betupi Sarawak, diatur ba Kpg Semadang, Jalai Puncak Borneo.
Chairman komiti pengatur, Mangang Samson ke mega Ketuai Kpg Semadang, madahka festival nya mujur diatur jenyau tiga taun ke udah ketegal bisi sukung ari Menteri Muda Perengka Pengangkut Datuk Dr Jerip Susil ke nyadi patron, Opis Menteri Daganh Temuai, Art, Daya Pengidup, Nembiak Lumba enggau Main Perintah Besai, beberapa opis enggau ejensi perintah sereta kompeni peribit.
Ku iya, taun tu festival nya deka diatur besai agi lalu mayuh agi aktiviti ditambah baka pekit nginti, pekit Miss Tagang, tanda tradisional enggau malu gong, pekit nyumai,lumba kayak, bazar pemakai enggau main ungkup nembiak mit.
Direktor festival Robert Kenneth madah, pematak besai ba festival ila iya nya pekit nginti ke deka diatur kena 1 Sept di semanjai Sungai Semadang di Kpg Semadang. — DayakDaily
