KUCHING, Julai 21: Gerempung Pemikir Dayak Sarawak (DTTAS) enggau Kelab Rotary Kuching ngenataika bantu ngagai mansa penusah angus di Rumah Lepang, Sayat, Engkelili.
Kededua gerempung ukai dikuasa perintah (NGO) nya mai guni berau, pemakai kering, pekayan sereta barang dapur lalu disadung ngagai peranak Rh Sayat.
Ba pengawa nya, DTTAS diarika kaban komiti bagi pekara ekonomi, Ibil Jaya alai Kelab Rotary Kuching diarika Larry Ong Soon Soon.
Semua pemeri nya diterima Tr Lepang ti ngarika sida sekayu rumah.
Ibil enggau Larry ba jaku pandak seduai ngarap mayuh agi NGO bela besaup ngenatai bantu ngambi ulih ngelempungka pemar ke ditapi mansa diatu.
“Mansa penusah angus tu beguna tulung lalu bisi 26 pintu ruang bilik dituntung penusah.
“Kelimpah nyendia bantu ngenyit, kami nyadung pemakai, barang dapur enggau pekayan,” ku Ibil.
Nitihka penerang Ibil, bantu ke disua DTTAS datai ari pemeri kaban gerempung ari selampur menua nyengkaum ari luar Sarawak.
Tambah Ibil, DTTAS diuluka presiden Elias Lipi Mat mengkang ngempuru pemeri (belanja) ari bala mayuh ngambi tau dikena mantu mansa
Ngenang kaul ke sama, Sapit Pemesai Pelajar Pelilih Lubok Antu Jim Andrew Janggi ke bela ngulu pengawa nya meri jaku terima kasih ngagai NGO nyengkaum Angkatan Pertahanan Awam Malaysia(APM) ti udah mantu.
Rumah panjai Lepang Sayat Engkelili, Lubok Antu ke diuan 167 iku angus ba penusah ke nyadi 15 Julai 2019 tu tadi. — DayakDaily
