PUTRAJAYA, Julai 27: Menteri Pelajar Dr Maszlee Malik kemari ngenataika penyinu ati iya ngagai niang pengajar Cikgu Catherine Janet Tiwi ti udah midang ba penusah kuarters staf Sekula Primari Bungan, Mulu, ke angus pagi ensana.
Ba penerang iya kemari, Maszlee madahka iya berasai sinu enggau penusah ke nyadi ti ngujungka Catherine bebadi nyawa ketegal tepekul maya nguji nyelamatka bakih serumah iya.
Niang beumur 25 taun udah nembuka latih ngajar ba Institut Pematih Pengajar (IPG) Miri lalu apai iya gawa nyadi raban Bomba di Balai Bomba enggau Penyelamat Bau.
“Kami deka meri bantu ke patut ngagai sida ke bekaul,” ku iya.
Ba penusah angus ke nyadi urung pukul 5.09 pagi ensana, dua iku pengajar indu bela bisi betu pengudah dua kuarters sekula nya ambis angus diempa api. — DayakDaily
