RM988 juta udah diungkup kena ngaga projek bekal ai di serata menua

filephoto DayakDaily.com
KUALA LUMPUR, Julai 27: Opis Menteri Pemansang Menua Pesisir udah ngungkupka RM987.92 juta dikena ngaga 77 projek bekal ai menua pesisir di serata menua kenyau ari taun 2016 ari baruh Atur Pemansang Lumpar Ke-11.

Menteri opis nya, Rina Mohd Harun, madahka nya meri pemaik ngagai 8,929 buah rumah.

Ungkup projek bekal ai menua pesisir di Sarawak, RM412.04 juta udah diungkupka berengkah ari Januari 2016 ngagai Jun nyin tadi nyengkaum 38 projek ke meri pemaik ngagai 1,818 rumah di negeri nya, ku iya ba sesi tanya saut maya aum Dewan Rakyat kemari lebuh nyaut tanya Mordi Bimol (PH-Mas Gading).

Nyaut tanya tambah Mordi sentang perambu alternatif bantu bekal ai di Sarawak, Rina madahka opis menteri nya deka berandau baru enggau perintah negeri nya lalu entara perambu iya nya ngaga projek hidro elektrik.

Sentang bantu bekal ai di Sabah ke ditanya Datuk Azizah Mohd Dun (BN-Beaufort), iya madah bepelasarka penemuai iya ke beliau Sabah empai lama, mayuh kerejasama deka dipejalaika entara perintah besai enggau perintah negeri nya ba pengawa ngelangkar perengkaguna ai enggau elektrik ke negeri nya. — DayakDaily