KUCHING, Julai 15: Menteri Besai Tun Dr Mahathir Mohamad sehari tu tadi ngulu sesi meri penerang betambit pintu pasal pemansang Sarawak di Wisma Bapa Malaysia, Petra Jaya ditu.
Penerang nya dikenataika Sekretari Perintah Sarawak Tan Sri Mohamad Morshidi Abdul Ghani.
Dulu ari nya, penatai Dr Mahathir di Wisma Bapa Malaysia, urung pukul 7.55 pagi, disambut Kepala Menteri Datuk Patinggi Abang Johari Tun Openg enggau bala menteri Kabinet Sarawak.
Dr Mahathir ke mega Chairman Pakatan Harapan datai di Kuching kemari ti nyadi penemuai iya keterubah ke negeri tu pengudah nyadi menteri besai ti kedua kali udah bekau Pakatan Harapan menang ba Pengawa Bepilih Besai ke-14.
Kemari, iya enggau bini iya Tun Dr Siti Hasmah Mohd Ali ngulu pengerami melah pinang uchu Chairman Tenaga Nasional Berhad, Tan Sri Leo Moggie.
Dr Mahathir enggau bini iya mulaika diri ke Kuala Lumpur ari Padang Bilun Entarabansa Kuching pukul 10.02 pagi tu tadi pengudah nemuai seraya kereja pengelama dua hari berengkah kemari. — DayakDaily
