Dr Mahathir dekaka aset kelebih agi sungai di Sarawak dikena memanah

Tun Dr Mahathir Mohamad

KUCHING, Julai 15: Menteri Besai Tun Dr Mahathir Mohamad dekaka aset di Sarawak kelebih agi sungai dikena memanah.

“Aku udah bejaku sentang potensi di Sarawak tu, kita meseti eksploitasi aset ke dikemisika kita baka sungai ke nyadi siti aset kelimpah tanah. Tanah besai amat di Sarawak dibanding enggau penyampau tubuh peranak negeri tu ke agi mimit.”

“Enti dibandingka dengan sungai, pemansang tanah diatu bepanggai ba pematut ari sukut rampa menua tang sungai, kitai ulih ngaga bemacham pekara baka ba perengka pengangkut, ngemansutka kuasa. Nitihka penerang ti diberi ngagai aku tadi, aku beratika potensi ba pemansang Sarawak nya sigi bisi lalu semua nya bepanggai ba chara kitai ngena aset nya,” ku iya.

Dr Mahathir madah munyi nya ngagai pemberita pengudah ngulu sesi penerang betambit pintu sentang pemansang di Sarawak urung 45 minit di Wisma Bapa Malaysia, Petra Jaya ditu pagi tu tadi, ti dikenataika Sekretari Perintah Sarawak Tan Sri Mohamad Morshidi Abdul Ghani.

Sama bisi datai, Kepala Menteri Datuk Patinggi Abang Johari Tun Openg, Sapit Kepala Menteri Datuk Amar Douglas Uggah Embas enggau bala menteri Kabinet Sarawak.


Tembu meri penerang nya, Dr Mahathir lalu dikerami Perintah Sarawak enggau pengawa melah kek beserimbai enggau hari pengada iya.

Nampung baru sentang penerang nya, ku Dr Mahathir iya bisi dipadah sentang pemeranak puku ari menua luar di Sarawak.

“Ari penerang nya tadi, aku beratika pemansang ukai semina fokus digaga di Kuching aja tang mega ba endur bukai sereta industri, mayuh mega pemeranak puku ari menua luar lalu aku pechaya nya ulih ditambah agi,” ku iya.

Lebuh ditanya sentang kaul Perintah Besai enggau Sarawak, Dr Mahathir madahka kerejasama entara kedua-dua perintah nya manah.

“Diatu kitai udah beberapa kali betemu lalu kitai ngasaika kerejasama entara Perintah Sarawak enggau Perintah Besai endang manah,” ku iya. — DayakDaily