Dikarang DayakDaily Team
Dalam timpuh 50 taun ke udah, Gerempung Bank Malaysia (ABM) udah bejalaika pengawa nyukung pengerembai enggau penegap atur pekara wang menoa.
Nengah inisiatif ti dilakar, ABM udah bendar bejalaika pengawa mantu ngangkatka ekonomi, ngintu pemaik mensia mayuh ke nyadi pengguna enggau pemansang ti meruan.
Semua tu udah nyendiaka gaya pengidup ti chukup lantang ngagai tetiap iku peranak Malaysia.
Juluk ABM ti nyerangkum perkara wang ba tetiap pengawa udah mandangka pengangkun gerempung.
Gerempung udah meratka pengawa ngaul raban komuniti ti kurang penatai pemisi, raban B40, raban sida ke timpang pendiau (PWD) sereta orang dagang mit enggau jelan pemesai (SME).
Nengah embing ABM, industri bank udah nyendia duit jali ba penyampau RM401.8 bilion ungkup SME. Atur tu udah mantu ngangkat pengerembai kasar produk Malaysia ba tikas 40 peratus.
Nengah atur nentuka servis perkara wang ulih diasaika semua, nya mandangka ABM udah bejalaika siti pengawa ti berat ke udah mujur mantu ngerembaika ekonomi ba serata menua.
Ngenegap atur nyaga pengelikun mensia mayuh
Ba jeman alai atur digital dikena ba pengawa bank, ABM meratka atur ngintu pengelikun mensia mayuh ke nyadi pengguna.
Penyuah penusah ditipu ba pekara wang nyengkaum penyalah siber ngujungka ABM bejalaika atur proaktif nyengkaum numbuhka ‘National Fraud Portal’.
Platfom tu digaga ngambi tau dikena nyeliah mensia mayuh ari ditipu nengah chara online, lalu nentuka peranak Malaysia ulih pechayaka servis ti bisi disedia bank.
Komitmen ABM ba senentang ngintu pengelikun mensia mayuh mandangka pengeran gerempung ba atur ngenegap kaul sama bela pechaya antara sektor bank enggau mensia mayuh.
Meratka gaya asal enggau Pekara Wang Gadung
Ba atur Malaysia napi pemar ba ubah gaya pengangat menoa, ABM mega mai sereta ngembing sektor bank ngemeranka chara kereja ti manah.
Atur ngeluarka ‘Association of Southeast Asian Nations (ASEAN) Sustainability Bonds’ udah nyadi siti bantu ke besai ari ABM ti seruran nyujung projek ti dikearap ulih ngintu pemaik rampa menoa.
Nengah atur meratka atur pekara wang ti tegap, ABM nentuka pengerembai ekonomi Malaysia enda ngerusak rampa menoa.
Tanggungpengawa ABM ti meratka ekonomi ke bekaul enggau atur ngurangka pengelepas karbon diakun chukup berat, kelebih agi ba atur dunya diatu nyingkang nuju dunya gadung.
Pengawa gerempung ti ngeransing sektor bank ngambika seruran meratka pemaik menoa udah ngeletak Malaysia ba penuduk lumur satu ba atur pekara wang gadung ba serata wilayah ASEAN.
Ngeringka Malaysia nengah Literasi Pekara Wang
Pelajar pekara wang nyadi siti agi kereja berat ke udah digaga ABM.
Nengah sekeda inisiatif baka ke Financial Industry Collective Outreach (FINCO), ABM mujur ngaul lebih 79,000 pelajar enggau rayat Malaysia.
Program dipejalai enggau juluk deka nyikap raban nembiak baru ba penau ti diguna lebuh maya netapka pemutus ba pekara wang.
Nengah atur meratka chara ngurus pekara wang ke betul, ABM ukai semina nyukung siku-siku orang aja tang mega mantu negapka ekonomi Malaysia ungkup timpuh panjai.
Nyukung Menua-Negapka Pengawa
Kelimpah ngintu pengelantang mensia mayuh, ABM mega udah bejalaika tanggungpengawa ba atur nyendia infrastruktur di Malaysia.
Mayuh bagi bank udah nyendia lun ba penyampau RM150 bilion ungkup projek infrastruktur menoa, nya nyengkaum infrastruktur pengangkut enggau pengerai.
Kelimpah mantu ngemansang Malaysia, ABM mega mantu ba maya menoa napi pemar baka ke ba senentang krisis pekara wang sereta pandemik Covid-19.
Mayuh bengkah bank nyendia bantu ba pekara wang ngambi tau ngelempung penusah ke bisi ditapi mensia mayuh. Bantu nya nyengkaum lun ‘moratoriums’ enggau chara baru mayar pulai lun.
Atur tu udah mantu ngenanka penegap ekonomi sereta ngintu tetiap pengereja pengawa maya napi pemar.
Kerejasama ungkup asil ke beguna
Pemujur ABM dalam timpuh 50 taun ke udah dijapai asil kerejasama manah enggau ijinsi-ijinsi ke megai tanggungpengawa. Bekereja enggau institusyen baka ke Central Bank of Malaysia enggau Securities Commission, ABM udah ngenuku sekeda polisi ti meratka pengerembai sereta penegap sektor bank.
Kerejasama begulai enggau ‘Leadwomen and TalentCorp’ mujur ngerembaika kaul industri bank ti seraris enggau juluk pemansang menoa.
Pengelama 50 taun udah ngejang, ABM deka seruran beratika chara napi pemar, kelebih agi ba inovasi pekara wang. Tanggungpengawa gerempung sigi enda nemu tembu, tang legasi sereta pengarap deka ngembing atur pekara wang Malaysia ba taun-taun ti deka datai.
Nyingkang Ke Mua
Ditumbuhka ba bulan November 1973, ABM ngarika 26 bengkah komersyel bank alai gerempung udah nentuka atur bank ba Malaysia tegap sereta ungkup semua orang.
Nyingkang ke mua, tanggungpengawa gerempung ba atur ngenanka penegap ekonomi enggau ngaga pemansang ti meruan tetap berat. Komitmen gerempung ba pekara inovasi enggau kerejasama udah nentuka sektor bank deka terus nyukung pengerembai sosio-ekonomi Malaysia.
Nengah pengarap ti udah teguh, servis sereta kaul begulai enggau komuniti, ABM sedia ngaul semua rayat lalu ngerintis jalai nuju pemaik ba pekara wang jemah ila. –DayakDaily
