SRI AMAN, Jun 12: Bansa Dayak diansak ngenegutka kerejasama enggau bansa bukai dalam pengawa ngemansangka nengeri tu.
Menteri Muda Pengelantang Komuniti Datuk Francis Harden Hollis madah, kerejasama ti endang udah bisi tu patut ditegi ngambika ulih nentuka semua bansa sepenemu sereta bebasaka pangan diri.
“Kaul ti endang udah rat nya enda patut ditejuka pia aja, tang meseti ditegutka kelebih agi maya musim pengerami baka Hari Gawai,” ku iya bejaku ba program Gawai Ngiling Tikai ke udah digaga di rumah Richard Baya, Kampung Temudok Baroh, Sri Aman kena malam Hari Minggu tu tadi.
Iya mega ngansak raban nembiak ngambika bebasa ke orang tuai, kelimpah ari seruran andal belajarka penemu bekaul main asal ngambika enda lenyai diserunyut jeman.
Ku iya nambah, penemu bekaul adat sereta main asal ke dikembuan aki ini kitai suba endang pekara ti pemadu berega lalu patut dipelajar ngambika enda punas.
Ba pengerami nya, Harden udah nyuaka geran perintah sepenyampau RM5,000 ngagai Komiti Pemansang enggau Pengelikun Genturung Pendiau (JKKK) rumah nya dikena sida bejalaika aktiviti semanjai taun, sereta bisi mega nyuaka 35 iti cheremin mata ngagai raban lunggar umur di genturung pendiau nya ke udah dipelanja Parti Sa’ati Rayat Sarawak (SUPP) Pampang Simanggang. — DayakDaily
