KUCHING, April 1: Democratic Action Party (DAP) ba Pengawa Bepilih Besai Ke-14 (PRU14) tu ila, berati deka bediri minta pilih ba 11 iti kerusi, ngerembaika pemujur sida ti udah menang ba lima ari enam kerusi maya pengawa bepilih besai ke sebedau tu.
Kerusi nya nyengkaum ba kerusi majoriti Melanau, Bidayuh, Iban enggau Orang Ulu dikena ngemujurka juluk parti nya nyadi parti ke ulih diterima semua etnik.
DAP nyangka deka bediri minta pilih di Parlimen Mukah, Mas Gading, Serian, Kapit, Bintulu enggau Lawas.
Mukah, Kapit enggau Lawas diatu dikuasa Parti Pesaka Bumiputera Bersatu (PBB), Serian siti kerusi dimenang Parti Sa,ati Rakyat Sarawak (SUPP) ba PRU13, lalu Bintulu enggau Mas Gading diatu dikuasai Parti Progresif Demokratik (PDP).
“Kami pechaya teulihka kerusi nya kelimpah ngenanka kerusi ti dimenang sebedau nya,” ku Sapit Chairman DAP negeri Chiew Ching Sing, kemari.
Pada PRU13, DAP udah menang ba Bandar Kuching, Stampin, Sarikei, Sibu enggau Lanang, lalu semina siti kerusi ke dimenang Parti Keadilan Rakyat (PKR) iya nya Miri.
“Kami deka bediri di 11 kerusi,” ku iya.
Kepala Menteri Datuk Patinggi Abang Johari empai lama madahka diri pechaya amat Barisan Nasional (BN) ulih ngambi pulai tiga iti ari kerusi ke diempu penyakal seraya netapka ambis kurang menang ba 28 ari 31 kerusi Parlimen di Sarawak. — DayakDaily
