Dikarang Chris Bishop
KUCHING, 17 Ogos: Tiga hari bejurut, Sarawak seharitu nadai ngerikud kes positif baru Covid-19 ngujungka penyampau semua kes mengkang 682.
Komiti Pengintu Penusah Ngenyit Negeri Sarawak (JPBNS) nengah surat penerang berita mega madah nadai kes gerai sereta dikemendar pansut ari spital dirikud seharitu.
“Enggau nya, penyampau kes positif Covid-19 ti udah gerai sereta dikemendar pansut ari spital mengkang 659 iku tauka 96.33 peratus ari penyampau semua kes.
“Empat iku mengkang diperubat ba wad isolasyen alai penyampau kes mati mengkang 19 iku.
“Seharitu bisi 2 kes baru PUI diriput lalu siku benung nganti pemutus peresa makmal,’ ku JPBNS.
Surat penerang nya mega madah 7 kluster mengkang aktif di Sarawak iya nya Kluster Syarikat Kejuruteraaan (8 kes), Kluster Mambong (7 kes), Kluster Pasar Stutong (7 kes), Kluster Sentosa (31 kes), Kluster PUI Melbourne (3 kes), Kluster Syarikat Pembinaan Kuching (2 kes) enggau Kluster Pasar Satok (4 kes).-DayakDaily.
